Apne ghar ko wapis jaao ro ro kar samjhaata hai,
Jahaan bhi jaaun mera saaya peeche aata hai,

Us ko bhi to jaa kar dekho us ka haal bhi mujh sa hai,
Chhup chhup reh kar dukh sehne se to insaan mar jaata hai,

Keh bhi de ab woh sab baaten,
jo dil me posheeda hain,
saare roop dikha de mujh ko,
jo ab tak naadeeda hain,
ek hi raat ke taare hain,
hum dono us ko jaante hain,
duuri aur majbuuri kya hai,
us ko bhi pehchante hain,

Be-khayaali mei yunhii bas ik iraada kar liya,
Apne dil ke shauq ko hadh se zeyaada kar liya,

Jaante they dono hum us ko nibhaa sakte nahin,
Us ne vaada kar liyaa main ne bhi vaada kar liya,

Awaaz de ke dekh lo shaayed woh mil hi jaaye,
Warna yeh umr bhar ka safar raayegaan to hai..

Aa gayi yaad shaam dhalte hi,
Bujh geya dil chiraagh jalte hi,

Khul gaye shehr-e-gham ke darvaaze,
Ik zaraa si havaa ke chalte hi,

Kaun tha tuu ke phir na dekha tujhe,
Mitt geya khawb aankh malte hi,

Ik taizz teer tha ke lagaa aur nikal geya,
Maari jo cheekh rail ne jungle dehall geya,

Soyaa hua tha sheher kisi saamp ki tarah,
Main dekhta hi reh geya aur chaand ddhal geya,

Aayi hai ab yaad kya raat ik beete saal ki,
Yehi havaa thi baagh mei yehi sadaa gharriyaal ki,

Mehak ajab si ho gayi parre parre sanduuq mei,
Rangat pheeki parr gayi resham ke ruumaal ki,

Gham ki barish ne bhi tere naqsh ko dhoya nahin,
Tuu ne mujhe ko khho diya maine tujhe khoya nahin,

Neend ka halka gulaabi sa khumaar aankhon main tha,
Yuun laga jaise woh shab ko dair tak soyaa nahin,

Aayina ab judaa nahin karta,
Qaid mei hoon rihaa nahin karta,

Mustaqil sabr mei hai koh-e-giraan,
Naqsh-e-ibrat sadaa nahin karta,

Rang-e-mehfil badaltaa rehta hai,
Rang koi wafaa nahin karta,

Ashk-e-ravaan ki nehr hai aur hum hain dosto,
Uss bewafa ka shehr hai aur hum hain dosto,

Yeh ajnabi si manzilein aur raftgaan ki yaad,
Tanhaayiyon kaa zehr hai aur hum hain dost,

Pages